រសៀលថ្ងៃទី១៥ ខែមិថុនា ឆ្នាំ២០២២ លោក ងួន ប៊ុណ្ណាន អភិបាលស្រុកអូររាំងឪ បានអញ្ជើញជួបសំណេះសំណាល សួរសុខទុក្ខ ថ្លែងអំណរគុណ និងផ្ដល់អនុសាសន៍ផ្ដាំផ្ញើជូនដល់ប្អូនៗក្រុមគ្រូពេទ្យស្ម័គ្រចិត្តនៃសម្ព័ន្ធគ្រូពេទ្យសហភាពសហព័ន្ធយុវជនកម្ពុជា ដែលបានចេញប្រតិបត្តិការដោយជោគជ័យនូវយុទ្ធនាការចាក់វ៉ាក់សាំងតាមខ្នងផ្ទះជូនដល់បងប្អូនប្រជាពលរដ្ឋទូទាំងមូលដ្ឋានស្រុកអូររាំងឪ។
ក្នុងជំនួបជាមួយប្អូនៗក្រុមគ្រូពេទ្យយុវជន-យុវនារីស្ម័គ្រចិត្តក្រោយពេលចុះប្រតិបត្តិការទៅកាន់ទីតាំងការងាររៀងៗខ្លួន លោកអភិបាលស្រុកក៏បានកោតសរសើរ និងវាយតម្លៃខ្ពស់ចំពោះការខិតខំរបស់គ្រូពេទ្យស្ម័គ្រចិត្តរយៈពេលកន្លងមកដែលទទួលបានសមិទ្ធផលផ្លែផ្កាជាបន្តបន្ទាប់។
លោកបានសម្តែងក្ដីរំភើបនូវទឹកចិត្តមនុស្សធម៌របស់ក្រុមប្អូនៗយុវជន ដែលបានបូជាកម្លាំងកាយចិត្ត ចុះបំពេញបេសកកម្ម ការងារមនុស្សធម៌ ដោយគ្មានការរួញរា និងគ្មានការភ័យខ្លាចក្នុងការប្រយុទ្ធប្រឆាំងជំងឺកូវីដ-១៩។ ជាមួយគ្នានោះដែរ លោកអភិបាលស្រុក ក៏បានផ្តាំផ្ញើឱ្យបងប្អូនក្រុមគ្រូពេទ្យទាំងអស់យកចិត្តទុកដាក់ខ្ពស់ក្នុងការថែទាំសុខភាព ដើម្បីរួមគ្នាប្រយុទ្ធប្រឆាំងនឹងជំងឺកូវីដ-១៩ ជាបន្ដទៀត និងជាពិសេសសូមប្អូនៗទាំងអស់យកបទពិសោធន៍ដែលបានអនុវត្តន៍កន្លងមក មកអភិវឌ្ឍន៍ខ្លួនក្លាយជាបុគ្គលដែលសង្គមត្រូវការ។
អត្ថបទ៖ 𝐒𝐎𝐔𝐍-𝐌𝐄𝐍𝐆𝐇𝐄𝐀𝐍𝐆
